“ЦАЙНЫ ИХ ЗАМ БА СОЁЛЫН ӨВ” ЭРДЭМ ШИНЖИЛГЭЭНИЙ ХУРАЛ ЗОХИОН БАЙГУУЛЛАА
Соёлын өвийн үндэсний төв, Бүгд Найрамдах Хятад Ард Улсаас Монгол Улсад суугаа Элчин сайдын яамтай хамтран 2024 оны 11 дүгээр сарын 30-ны өдөр “Цайны Их зам ба Соёлын өв” эрдэм шинжилгээний хурал зохион байгууллаа.
Тус Үндэсний төвийн “Өв-Эрдэнэ” театрт танхим болон цахим хослуулан зохион байгуулсан энэхүү эрдэм шинжилгээний хуралд БНХАУ-аас Монгол Улсад суугаа Элчин сайдын яамны төлөөлөл, СУИС-ийн Соёл, урлаг судлалын хүрээлэн, Монголын Үндэсний музей, Улаанбаатар аялал жуулчлалын холбоо, БНХАУ-аас Хятадын Архитектурын түүхийн хүрээлэн, Ү-Ишан хотын Түмэн бээрийн цайны замын соёл судлалын нийгэмлэг зэрэг байгууллагын төлөөллүүд оролцлоо.
СУИС-ийн Соёл, урлаг судлалын хүрээлэнгийн эрдэм шинжилгээний ажилтан С.Энхнаран(Монгол цайны ёслолыг музейн оролцоотой өвлөн уламжлуулах нь), Түмэн бээрийн цайны замыг хамтран Дэлхийн өвд бүртгүүлэх албаны хэрэг эрхлэх газрын орлогч дарга Ван Фэнжү(Хятад, Монгол, Орос гурван орны харилцаа хамтын ажиллагааг бэхжүүлж, Түмэн бээрийн цайны замыг хамтран Дэлхийн өвд бүртгүүлэх ажлын хэрэгжилтийг түргэтгэх), Хятадын Архитектурын түүхийн хүрээлэн-Ван Мин(Түмэн бээрийн цайны замыг үндэстэн дамнасан хамтран дэлхийн өвд бүртгүүлэх ажлын техникийн ажлын явц), Монголын Үндэсний музейн эрдэм шинжилгээний төвийн дарга, Доктор Ч.Туулцэцэг(Цайны зан үйлтэй холбоотой зарим эд өлгийн судалгаа), Улаанбаатар аялал жуулчлалын холбооны Гүйцэтгэх захирал Д.Гэрэлтөв, МУИС-ийн багш, Доктор Ц.Эгшиг(Монгол дахь “Цайны их зам”-ын аялал жуулчлал, эдийн засгийн үр нөлөө), Ү-Ишан хотын Түмэн бээрийн цайны замын соёл судлалын нийгэмлэгийн ерөнхийлөгч Чен Гуанюань(Түмэн бээрийн цайны зам ба Бүс ба зам) нарын эрдэмтэн судлаач, албаны хүмүүс илтгэл хэлэлцүүлж, “Цайны их зам ба Соёлын өв” сэдвийн хүрээнд үйл ажиллагаа явуулдаг байгууллага, судлаачид танилцуулга хийснээр хурал өндөрлөлөө.
